حروف کا استعمال

ححرف کی تعریف کریں اور وضاحت بیان کریں اور مختلف حروف کا استعمال مثالوں کے ساتھ بیان کریں ۔

حرف : حرف ایسا کلمہ جو تنہا کوئی معنی واضح نہ کرے جبکہ جملے میں آ کر اس کے مطلب کو مکمل واضح کر دے جیسے گلاس میں پانی ہے۔ احمد کالج میں پڑھتا ہے۔  احمد نے ثاقب کو مارا ۔ مجھے ناصر سے ملنا ہے۔

ان جملوں میں( میں ، نے ،کو ، اور سے) حروف ہیں۔ اگر ان حروف کو جملوں میں سے نکال دیا جائے تو یہ جملے نہیں بلکہ حروف کا مجموعہ قرار پائیں گے ۔

ذیل میں حروف اور ان کا استعمال اور مثالیں ملاحظہ ہوں: ۔

1۔حروف جار :

وہ حروف ہیں جو اسم کو دوسرے اسم کے ساتھ اور فاعل کو فعل کے ساتھ ملاتے ہیں ۔ وہ یہ ہیں:- میں، سے ،تک، اوپر، نیچے ،آگے ،پیچھے، اندر، باہر اور درمیان وغیرہ۔

2۔ حروف علت : علت وجہ کو کہتے ہیں۔ وہ حروف ہیں جو کسی بات کے سبب کو ظاہر کریں جیسے تاکہ، لہذا، کیونکہ، کہ، سوا ، اس واسطے وغیرہ ۔

3۔حروف عطف:  وہ حروف ہیں جو دو اسموں ، دو فعلوں اور دو جملوں کو آپس میں ملائیں حروف عطف کہلاتے ہیں ۔ جیسے و ، اور ، کر کے ، پھر وغیرہ ۔

مثالیں : شام و سحر ، دن اور رات ، وہ آیا پھر چلا گیا، اسلم آ کے چلا گیا،  سعید آیا کھانا کھا کر چلا گیا وغیرہ ۔

4۔حروف شرط و جزا : وہ حروف ہیں جو شرط کے موقع پر بولے جاتے ہیں حروف شرط کہلاتے ہیں۔ جیسے اگرچہ ، وگرنہ، ورنہ، نہیں تو ، ہر چند وغیرہ ۔ وہ حروف جو شرط کے جواب میں بولے جائیں حروف جزا کہلاتے ہیں۔ جیسے تب، تو، سو، جیسے وغیرہ۔

5۔ حروف افسوس:  وہ حروف جو اظہار افسوس کرتے وقت گھبراہٹ اور تکلیف میں بولے جاتے ہیں وہ مندرجہ ذیل ہیں:-  حیف ، صد حیف ،افسوس، صد افسوس، اف، ہائے ہائے ،آہ وغیرہ۔

6۔ حروف تاکید:  وہ حروف جو کسی کام کو کرتے وقت تاکید کے طور پر بولے جاتے ہیں۔ جیسے:-  ضرور، سراسر،  بے شک ، ہرگز وغیرہ ۔

7۔حروف ندا:  وہ حروف جو کسی کو پکارتے وقت بولے جائیں انہیں منادی حروف بھی کہتے ہیں۔

جیسے:-  اے، ابے، ارے، او ، اجی یا وغیرہ ۔

8۔ حروف انبساط : وہ حروف جو کسی خوشی یا مسرت کے موقع پر بولے جاتے ہیں ۔

جیسے :- واہ واہ، سبحان اللہ، ماشاءاللہ، آہا ، او ہوہو  وغیرہ ۔

9۔ حروف تعجب: 

وہ حروف جو کسی عجیب چیز کو دیکھنے کے بعد حیرت کے اظہار کے طور پر بولے جاتے ہیں۔

جیسے :- اللہ اللہ، اللہ اکبر، واہ رے کیا ؟ وغیرہ ۔

10۔ حروف ایجاب:  وہ حروف ہیں جو کسی سوال کے جواب یا کسی کے کچھ پوچھنے پر جواب کے طور پر بولے  جاتے ہیں ۔

:- جیسے جی جی، ہاں، اچھا، بہت اچھا، واقعی، ٹھیک، درست ،کیوں نہیں، بجا وغیرہ ۔

11۔  حروف بیان :-  وہ حروف جو کسی بات کی وضاحت کرنے کے لیے دو جملوں کے درمیان بولے جاتے ہیں۔

:-  جیسے کہ، تاکہ، مبادہ وغیرہ ۔

12۔حروف نفی :- وہ حروف ہیں جو انکار کے معنوں میں استعمال ہوتے ہیں ۔

جیسے :- نہ کہ ، مت وغیرہ۔

13۔ حروف تحسین :-  وہ حروف جو کسی کی تعریف کرنے اور اس کی کارگزاری پر شاباش دینے کے لیے بولے جاتے ہیں ۔

جیسے:-  سبحان اللہ، مرحبا، جزاک اللہ، زندہ باد اور کیا کہنے وغیرہ ۔

14۔حروف نفرت:-  یہ وہ حروف ہیں جو نفرت لعنت اور پھٹکار کے موقع پر بولے جاتے ہیں۔

:-  جیسے تف، لعنت ،پھٹکار، تھو، در در وغیرہ ۔

15۔ حروف استفہام :- یہ حروف کسی سے سوال کرنے اور کچھ پوچھنے کے موقع پر بولے جاتے ہیں ۔

جیسے:-  کیا، کیسے، کیوں، کب ،کس واسطے، کس لیے۔ وغیرہ ۔